Sheekh Xasan Daheeye oo ka mid ah culimada degmada Boorama ayaa Gudoomiyaha gobolka Awdal ku eedeeyey inuu diinta u gefay, waxaanu sheegay in talaabo laga qaado.
Wadaadka ayaa sheegay in dad ka ag dhowaa goobtii uu diinta ku caayey u sheegeen, inkastoo uu xusay in aanu goobtaasi joogin.
Hasse ahaatee gudoomiyaha gobolka Awdal Cabdiraxmaan Axmed Cali ayaa sheegay in aanay waxba ka jirin sabab diinta uu u caayaana aanay jirin maadama oo uu qof muslim ah yahay, waxaaanu wadaadka ku eedeeyey in uu yahay qof masaajidka ka dhigtay goob uu dadka ku caayo, isagoo tilmaamay in badhasaabyo hore uu sidaas oo kale ku sheegay in ay diinta caayeen.
Gudoomiyaha ayaa sheegay inuu igu soo cadeeyo arintaasi, hadii kale talaabo laga qaadi doonno, maadama oo goobtaasi ay wada joogeen dad badan oo xafladi ka socotay kamaradaha wariyeyaashuna wada shidnaayeen.
Sidoo kale, Sheekhul Baladka Awdal Sh.Cabdilah Sh.Cali Jawhar oo ka hadlay Kulan wayn oo Culimada iyo Bulshada magaalada Boorama ay xalay iskugu yimaadeen loogana hadlayay Gudoomiyaha Awdal ee loo haysto in u Diinta islaamka Aflagaadeeyay ayaa waxa u sheegay “Waxan Madaxwaynaha, Madaxwayne ku xigeenka, iyo Wasiirka gudahaba u soo jeedinayaa in Ninkaas ( Gudoomiyaha Awdal) Marka koowaad xasaanada laga qaado, Maxkamadna lasoo taago kadibna Sharciga islaamka lamariyo”.
Si kastaba ha ahaatee, khilaaf weyn baa dhexyaalla culimada magalada Boorama iyo Gudoomiyaha gobolka Awdal, kaasi oo lagu eedeeyey kiis adag oo ah aflagaado diimeed
