Warar dheeraad ah ayaa laga helayaa Shil Gaari oo Sababay dhimasho kaasoo ka dhacay Wadada isku xirta magaalada Mogadishu iyo Degaanka Jasiira, Gaari shilka galay oo ahaa nooca raaxada ah, sababta lagu sheegay Xawaaraha sare ee Gaariga..
Wararka ayaa sheegaya in 3-Qof ay saarnaayeen Gaariga kuwaasoo kala ahaa 2-Gabdhood iyo Askari ka tirsan Ciidamada Dowlada Federaalka isla markaasna wade ka ahaa Gaariga, iyadoo dhamaan 3-da Qof ay ku dhinteen shilkaasi, Dad goobjoogayaal ah ayaa warbaahinta u xaqiijiyay in shilka gaariga uu dhacay.
Iyadoo gaariga uu ku socday Xawaare sare taasoo keentay inuu jidka ka baxo gaariga oo uu guud ahaantiisa burburo, Goob-joogayaasha waxay sidoo kale sheegeen in gaariga shilka galay uu tartan kula jiray gaari kale oo ay wateen rag kaloo dhalinyaro ahaa oo ka yimid deegaanka Jasiira ee duuleedka magaalada Muqdisho.
Shilkaan khasaaraha dhimashada leh sababay ayaa kusoo aadaya, iyadoo maalinta Jimcaha ah ay dadweyne badan u damaashaad tagaan xeebta Degaanka Jasiira.
