Kenya Oo Diyaariyeen Qorshe Lagu Hormarinaayo Nolosha Qaxootiga Dalkeeda ku Sugan…

Warar dheeraad ah ayaa laga helayaa Qorshe ay dejisay Madaxtooyada Kenya kaasoo salka ku heysa sidii Qaxootiga tirada badan ee ku noolaa Dalkaasi 30-kii sano ee u dambeysay kuwaasoo ka soo cararay colaadaha Dalalka deriska la ah si gaar ah Burundi, Ethiopia, Konfur Suudaan, Somalia iyo Congo..

Wararka ayaa sheegaya in Qaxootigaan oo tiradoodu kor u dhaafeyso 1-Million oo Qof, iyadoo Qorshahaan uu ahaa mid muddo soo jiitamaayay ayaa ugu dambayn waxaa ku dhaqaaqay inuu fuliyo Madaxweynaha waqtigan ee Kenya William Ruto, kaas oo 28kii bishii Maarso ee tagtay kaga dhawaaqay Madaxtooyada dalkaasi.

Saamaynta Qorshahaan Ee Qaxootiga Somalida

Xerada Dhadhaab, waa tan ugu weyn ee caalamka ee martigelisa Dad qaxooti ah, dadka ugu badan ee xeradaan ku nool ayaa ah Soomaali ka soo cararay dagaalada iyo abaaraha daba dheeraaday ee Somalia, qiyaas ahaan waxaa lagu sheegaa Soomaalida ku xeraysan xeryaha isa-saaran ee Dhadhaab ku yaal in ka badan 400-Kun oo Qof oo halkaas ku noolaa tan iyo markii albaabada loo furay xeryahaan bilowgoo 90-kii wax yar uun kadib burburkii Dowladdii Dhexe ee Somalia.

Inkastoo Shacbiga magaalada Gaarisa ku nool ay yihiin Soomaali, marka la eegana ayna ay isku isir yihiin qaxootiga Soomaliyeed, haddana shuruucda Kenya iyo duruufaha nololeed ee qaxootiga ku sugan yahay ayaa keentay inaysan horumar ka samayn dhexgalkooda bulshada.

Kenya oo xal u aragta inaan qaxootiga dalkeeda ku nool aysan kusii tiirsanaan karin kaalmada aduunku bixiyo, tabarucaadka hay’adaha ayaa qaaday qorshaha Shiriki ay is-dhexgalka dadka deegaanka iyo qaxootiga, waxaana ay fursaddani nolol dhaanta middooda u abuuraysaa qaxootiga oo ay kamid yihiin dadka Soomaaliyeed.

Caqabadaha haysta qorshahan Shirika

Qorshaha Shiriki oo ah mid bilow ah oo aan hore noociisa oo kale aan loo tijaabin, ayaa la kulmaya caqabado ku hor gudban dhaqaajintiisa, waxaana markiiba ka horyimid qaar kamid ah Baarlamaanka dalka Kenya oo soo jeediyey inaan weli la gaarin waqtigii la isku dhafi lahaa qaxootiga iyo dadka degaanka.