Siyaasiyiinta Mucaaradka oo ka Digay Boobka iyo Xaraashka Dhulalka Danta Guud ee Dowladda..

Qoraal ay soo saareen Qeyb ka mid ah Kooxda Mucaaradka Dowladda Federaalka ee fadhigoodu yahay Magaalada Mogadishu, ayaa uga digay Ganacsatada iyo Shirkadaha iney iibsadaan Dhulalka ay Hogaanka fashilmay ee Villa Somalia ku hayo Dhulalka danta guud ee Qaranka..

Waxay Hogaanka Dowladda Federaalka ku eedeeyeen inay joogto ka dhigatay  barakicinta danyarta, ku dul habsiga xarumo waxbarasho iyo kuwo daryeel caafimaad, iyagoo sheegay in dhulka badankiis si xaraash ah looga iibinayo Ganacsato, halka qaar la siiyo qoysas gaar ah, qaar kalana lagu laaluusho Siyaasiyiin iyo Xildhibaano.

“Haddaba, waxaan uga digaynaa ganacstada sida sharci darrida ah looga iibiyo dhulka danta guud iyo dadka kale ee la siiyey, looga qaanbaxay, ama lagu laaluushay in aysan ku kadsoomin milkiyadda iyo yeelashada dhulka dowladda, waana in ay ogaadaan,” ayaa lagu yiri warsaxaafadeed ay soo saareen.

Siyaasiyiintan waxay sidoo kale muujiyeen walaac xooggan oo ku saabsan xaaladda amniga, dhaqaalaha, iyo hab-maamulka siyaasadeed ee dalka. Waxay sidoo kale carrabka ku adkeeyeen in loo baahan yahay in dowladda hadda jirta ay si degdeg ah wax uga qabato caqabadaha taagan.