Masjidka Minneapolis Oo Wajahaya Hanjabaado Kooxo Xagjir ah, Xoogaga Amaanka Oo xoojiyay Amniga..

Warbixino ay soo saareen Saraakiisha Amaanka ee Magaalada Minneapolis ee Gobolka Minnesota, ayeey ku wargaliyeen Maamulka Xarunta Islaamiga ah ee Abuubakar As-Saadique, iney jirto hanjabaado rabshado xambaarsan oo la rumeysan karo oo lala beegsanayo Masaajidka, kuwaasoo la sheegay inay ka imaanayaan kooxaha xagjirka ah. Hanjabaadahaasi oo lagu faafiyay baraha bulshada ayaa horseeday in la adkeeyo tillaabooyin amni iyo in si ku meel gaar ah loo hakiyo Howlihii Waxbarasho ee Masjidka…

Masjidka oo ku yaalla Konfurta magaalada Minneapolis kana mid ah kuwa ugu weyn Gobolka, ayaa wuxuu u adeegaa Bulshada Soomaaliyeed ee firfircoon ee magaalada, Waxeyna la kulmeen Hanjabaado hore, laakiin dhacdadii u dambaysay ayaa keentay jawaab adag oo ka timid Hey’adaha Amaanka, Habeenimadii Jimcaha, Boliiska iyo Laamaha kale ee Amaanka ayaa ku wargeliyay Howlwadeenada Masaajidka hanjabaadaha, iyagoo sheegay inay si firfircoon u baarayaan shaqsiyaadka mas’uulka ka ah.

Saraakiisha Amaanka ayaa u xaqiijiyay Howlwadeenada Masaajidka iney si dhab ah u qaadanayaan hanjabaadahaasi ayna wadaan baaritaano, Waxay la wareegeen Amaanka Masaajidka, waxayna la socdaan dhaqdhaqaaqyada agagaarka Masaajidka,” ayuu yiri Maxamed Xambaase, Maamulaha masjidka, Iyadoo adeegyadii salaada ee caadiga ahaa ay weli socdaan oo aan waxba iska bedelin, Duruusta Qur’aanka iyo Barnaamijyada kale ee Waxbarashada ayaa muddo kooban la hakiyay si taxadar leh, Xambaase ayaa xusay in hadda ay dib u soo laabteen howlahaasi, inkastoo feejignaan dheeri ah lagu jiro. “Ardayda waxaan siinay nasasho ku meel gaar ah, laakiin xaaladda hadda waa la xakameynayaa, waxaana jirta cabsi yar oo ka jirta bulshadeena,” ayuu raaciyay.