Faahfaahin dheeraad ah ayaa laga helayaa weeraro gaadmo ah oo dhowr degmo ay ku qaadeen Kooxda Argagixisada, si loo carqaladeeyo Amaanka & Doorashada, waxaana la sheegay iney weeraradaan iska kaashadeen Kooxaha Gacan saarka leh Argagixisada & Shababka…
Wararka ayaa sheegaya in Weeraraan lagu qaaday degmooyinka Kaxda, Yaaqshiid ( Darusalaam), Heliwaa & Dayniile, markii hore dhacay qaraxa Kaxda, oo lala beegsaday saldhigga Boliiska Degmada, kadibna waxaa xigay rasaas iyo weerar culus, oo lagu qaaday isla saldhigga, taasi oo socotay ku dhowaad saacad.
Sidoo kale Kooxda Shabaabka ayaa weeraray fariisimo ku yaal Calamada ilaa Ceelasha Biyaha, halkaasi oo rasaas xoogan laga maqlayo. Madaafiic ayaa sidoo kale ku dhacay xaafado ka tirsan inta u dhaxeysa degmooyinka Shibis iyo Shangaani.
Magaalada Muqdisho ayaa shantii sano oo uu maamulaayay Farmaajo ka dhaxashay Shabaab sidii hore ka xoog badan, oo saacaddii ay doonta soo weerarta magaalada, sidoo kalena canshuurta ganacsi kasta oo ku yaalla magaalada, iyadoo Weerardaan la sheegay iney salka ku heyso sidii Xukuumada Rooble loogu eedeyn lahaa iney amaanka ka gaabisay laguna carqaladeeyo Doorashada.
